Crea sito

Servissi divìn (prim)

Na liturgìa dël servìssi divin

Tirà da la veja liturgìa valdèisa: “La liturgie vaudoise” ou la manière de célébrer le service divin comme elle est établie dans l’église évangélique des vallées du Piémont, Lausanne: Blanchard, 1842. http://goo.gl/ZzfQSp 

Preludi

Introdussion

Nòstr agiùt a sia ant ël nòm ëd Nosgnor, ch’a l’ha fàit ël cel e la tèra. Amen!

Confession ëd pecà

Mè frel e seur, che minca un ëd vojàutri as presenta ‘dnans a Nosgnor, për fèje, con tut ël cheur, ëd manèra ùmil e sincera, na confession ëd pecà, an andasendje dapress a coste mie paròle:

"Nosgnor! Pare etern e tut-potent! Nojàutri i confessoma e arconossoma, dëdnans a toa santa majestà, ch’i soma dij pòver pecador, concepì e nà ant ël pecà e ant la corussion, ch’i l’oma la propension al mal, ch’i soma, da noi medèsim, nen bon a fé ‘d bin, e ch’ i rispetoma nen, an diverse manere, ij tò sant comandament, parèj che i tiroma an sù nojàutri, për tò giust giudissi, la punission e la mòrt. Contut, Nosgnor, i l’oma ‘n grand dëspiasì d’avèj ofendute. I condanoma nojàutri e ij nòstri vissi, con un pentiment ës-cet, an sustanda che tòa grassia a ven-a an agiut a nòstra misèria. Che Ti veuje, donca, avèj pietà ‘d nojàutri, Nosgnor, ch'it ses tant bon, Pare ‘d misericòrdia, ant ël nòm ëd tò Fieul Gesù Crist, nòstr Signor. An përdonanda nòstri pecà, acordane e aumenta an nojàutri, dì aprèss dì, le grassie ‘d tò Spirit Sant, parèj che, an arconossand ëd tut nòst cheur, nòstra ingiustissia, i sio tocà d’un dolor ës-cet, ch’a anienta an nojàutri ël pecà e ch’a porta ij frut dla giustissia e dl’inossensa, coj ch’at son gradì, për Gesù Crist, nòstr Signor. Amen!"

Orassion (Apress ël cant d’un Salm e anans dël sermon)

Nosgnor, tut-potent e nòstr Pare dël cel! It suplicoma, conforma le promësse ch’at l’has fane, d’esse Ti antrames coj ch’a son radunà ‘n tò nòm e ‘d scutene cand nojàutri i t’invocoma ant ël nòm ëd tò Fieul; ch’at piasa ‘d vardene an toa misericòrdia, e d’alvé a Ti ij nòstri pensé e ij nòstri desideri, parèj ch’it rendoma ancheuj ‘n servissi ch’at sia gradì. 

Gran De! Nojàutri is umilioma dëdnans a Ti; i adoroma toa màssima Majestà; i selebroma toa saviëssa, toa potensa e toa benevolensa, cola ch’as mostra con tant splendor ant le grand’ euvre dla creassion e ‘d nòstra redension për Gesù Crist. It benedissoma, Nosgnor, për tuti ij bin temporaj e spirituaj che nojàutri i arseivoma da toa man generosa. Ma it laudoma, an particolar, con tuti ij cristian ch’a son radunà ancheuj ambelessì, che ti’t l’has mandà Tò Fieul an ës mond për salvene; e che aprèss d'avèjlo consignà për nòstre trasgression, ti’t l’has arsussitalo për nòstra giustificassion. Nojàutri it rendoma gràssie për tut lòn ch’it l’has donane, për costa gloriosa arsurression, na tan granda esperiensa d’inmortalità.

Nosgnor! Toa glòria a l’é granda an tute le Cese, e la làuda ‘d Tò Nòm a arsona an tute le radunanse dij tò sant. Che nòstre assion ëd grassie a monto dëdnans a tò tròno. Rendne degn d’avèj part un dì a l’arsurression dij giust a la glòria dël regn dij cej, andoa Gesù Crist a l’é intrà coma nòstr precursor, andoa Chiel a viv e a regna, andoa a l’é glorificà e adorà con Ti e con l’ Ëspirit Sant, De benedì për sèmper. Amen.

Nosgnor! Che nojàutri i sio istruì da toe Sante Scriture, përché i dovoma minca dì lesje, scoteje e mediteje. Anlumina ij nòstr ëspìrit e purifica ij nòstri cheur, parèj ch’i podoma comprende e arsèive, coma ch’as dev, lòn ch’a-i é arvelà; guarda ij tò minister, parèj che a nunsio toa Paròla con purëssa, ciairëssa, semplicità e cossiensa. Rend d’efèt soa predicassion an virtù dlë Spirit Sant, për che costa santa smens a sia arsèivùa ant ij nòs cheur, coma ant una tèra bin prontà; ch’a-i porta ‘d frut con abondansa; che nojàutri nen mach i scotoma toa Paròla, ma ch’i doma da ment, an vivend ant na manera conform a toe divin-e istrussion, e che nojàutri i riva a la fin a la salvëssa eterna, për Gesù Crist, ch’a l’ha comandane ‘d preghé an disand: 

Pare nòstr, ch’it ses ant ij Cej, ch’a sia onora tò nòm. Ch’a ven-a tò regn, ch’as fasa tòa volontà coma ‘n cel parèj an tèra. Dane ancheuj nòst pan cotidian. E përdon-ne ij nòstri débit, coma noi i-j përdonoma ai nòstri debitor. E fane nen droché an tentassion, ma liber-ne da la mal. Përché a l’é a Ti ch’a aparten ël regn, e la potensa, e la glòria për sèmper. Amen.

Orassion (apress ël sermon)

Nosgnor tut-potent! Nojàutri it ringrassioma për la grassia ch’it l’has fane d’avèj podù scoté ancheuj toa Paròla: rend d’efet, për tò Spirit Sant, j'istrussion ëd salùte ch’a l’ha dane, parèj che soa Paròla a dimòra an nojàutri con abondansa e an ampinissa ‘d saviëssa.

Sovran Signor dël mond! Ti ch’at fas ël destin dle nassion, nojàutri it pregoma për i Rè, ij prinsi e le autorità ch’it l’has fidà l’ govern dij pòpoj e l’aministrassion dla giustissia. It adressoma nòstri vòt an particolar an favor dël Rè ___ , nòstr stimà Sovran, e për tuta la famija real; spàntia ans lor toe benedission; drissa ij sò vòt e imprèise, e fà che sota ‘l regn ëd ___ nojàutri as peussa servite ëd manera libera, an pas e prosperità.

Nojàutri it suplicoma ëdcò për tute le person-e ch’a l’han na quàich autorità antrames a nojàutri; benedìss soa aministrasion përché a sìa për toa glòria, për gardé la moral e për la bon-a salute dël pòpol fidà a soe soagn.

Nojàutri it pregoma ëdcò për le potense amise e aleà d’ës Ëstat e, an particolar, për cole ch’a professo nòstra istèssa fej e ch’an fan gòde j’efet argiojissant ëd soa beneficensa cristian-a; benediss ëdcò le person-e generose ch’a manifesto soa carità a nòstr rësguard, sia për sosten-e la religion, sia për ël solagi dij pòver.

Nojàutri it pregoma, Nosgnor, nòstr Pare e nòstr Salvator, për tuti coj che Ti ‘t l’has stabilì pastor an toa Cesa, e dzortut për coj che Ti ‘t l’has donaje la condota dij strop ëd coste Val; rendje animà da tò Ëspìrit, parèj ch’a compisso sò ministeri con fidelità e diligensa, e ch’a travajo con fòrsa për la conversion e la salvëssa dj’ànime. Fà nasse daspërtut, e dzurtut antrames nojàutri, dij minìster fidej, impegnos, ùmil e ch’a l’abio cara la vrità e la pas, e për lòn fà ‘l don ëd toa grassia e tëmma a coj ch’a saran destinà un dì a tò servissi ant ël ministeri sant.

Conserva a costa Cesa la pas ch’a gòd ancheuj e seguita a spantié ij tò favor pì pressios andzora ‘d costa porsion ëd toa ardità, che Ti ‘t l’has an manera tant miracolosa preservà an coste contrà. Guerna an l’istèssa manera ij àutre cese, e faje sente l’efet ëd toa compassion paterna a cole ch’a seufro për la profession ëd toa vrità.

Nosgnor ëd minca consolassion! Nojàutri it racomandoma tuti ij pòpoj ch’a son crussià da la pestilensa, da la guera ò da la fam; tute le person-e che ‘t visite con ëd maladìe, con la povertà o con dj’àutre disgrassie quai ch’a sio. Nojàutri it pregoma an particolar për ij malavi ‘d costa cesa e për tuti coj ch’a l’han da manca dal sostegn ëd nòstre orassion. Delivra cole person-e dai sò sagrin, ò nostr De! Dzurtut, fa che lor a capisso bin ch’a l’é për l’efet ëd tò amor che ti a-j pròva, parèj che an seufrend con passiensa e an arnunsiand a ij sò pecà, lor a oten-o ël boneur che ti ‘t l’has promettù ai tò fedej.

Pare dla misericòrdia! Ti ch’it veule esse arconossù coma ël Dé e ‘l Salvator dël mond antregh, ant la Redension ch’a l’ha procurà Tò Fieul Gesù Crist, fa che coj ch’as treuvo ancora privà ‘d toa conossensa e a son ant la ténëbra dl’ignoransa e dl’eror, a sio anluminà da tòa lus e portà ant ël senté dla salvëssa, ch’a consist ant l’arconòsse Ti coma ël sol e ver De e Gesù Crist che Ti ‘t l’has mandane. Anrichìss sèmper ëd pì ‘d toe benedission coj ch’a Ti ‘t l’has già onorà ëd toa conossensa, parèj che tuti ansema it adoroma coma nòstr De, nòstr Creator e nòstr Pare; e che noi i sio sogetà a Gesù Crist, To Fieul, coma nòstr Redentor e nòstr Rè.

Për finì, ò nòstr De e nòstr Pare, a nojàutri ch’i soma venù ambelessì a scoté toa Paròla, fane la grassia che, penetrà dij sentiment ëd nòstra miseria ëd natura, convint che ij nòstr pecà an rendo nen meritévol d’avèj part a tò regn, i foma ricors a toa misericòrdia për Gesù Crist, nòstr Salvator; che nojàutri i butoma an Chiel tuta nòstra fiusa, parèj ch’a abita an noi, për dësblé tute le abitùdin dël pecà e për fruté na vita neuva.

Scotne, Pare ‘d grassia! A l’é ant ël nòm ëd tò Fieul che nojàutri it suplicoma.

Pare nòstr, ch’it ses ant ij Cej, ch’a sia onora tò nòm. Ch’a ven-a tò regn, ch’as fasa tòa volontà coma ‘n cel parèj an tèra. Dane ancheuj nòst pan cotidian. E përdon-ne ij nòstri débit, coma noi i-j përdonoma ai nòstri debitor. E fane nen droché an tentassion, ma liber-ne da la mal. Përché a l’é a Ti ch’a aparten-o ël regn, e la potensa, e la glòria për sèmper. Amen.

Signor, aumenta nòstra fèj!

Credo

Mi i chërdo an De, Pare tut-potent, Creator dël cel e dla tèra. E in Gesù Crist, Sò ùnich Fieul, nòstr Signor, ch’a l’é stàit concepì d’Ëspìrit Sant, ch’a l’é nà da Marìa vèrgin, ch’a l’ha patì sota Ponsio Pilàt, ch’a l’é stàit butà an sna cros, ch’a l’é mòrt e l’è stàit sotrà. Ch’a l’é calà giù ant j’ìnfer, ch’a l’é arsussità dij mòrt ël ters dì. Ch’a l’é montà sù an cel, a l’é setasse a la drita ‘d De, Pare tut-potent.. Da là a vnirà për giudiché ij viv e ij mòrt.. Mi i chërdo an l’Ëspìrit Sant, la santa Cesa catòlica (universal), la communion dij sant, la remission dij pecà, l’arsurression dla carn, la vita eterna. Amen.

Benedission (Apress ël cant d’un Salm, ël minìster a dà la benedission)

Che ‘l Signor av benedissa e av goerna; che ‘l Signor av guarda con n’oej ‘d favor e av sia propissi; che ‘l Signor a volta soa facia anvers a voi e av manten-a ‘nt la pas e ‘nt la prosperità. Andé an pas, arcordeve dij pòver e che ‘l De dla pas a sìa con vojàutri e con vòstre famìje. Amen.