Bin-ëvnù

RÒBA DA MAT? I SOMA 'L PRIM E L'ÙNICH SIT AN SLA FEJ CRISTIAN-A ANDOA CHE TUT A L'É AN LENGA PIEMONTÈISA STÀNDARD

Ant un temp d’omologassion mondialista che squasi tute le cese e j'organissassion cristian-e a veulo parlé al mond e a mepriso le lenghe cite tanme ‘l piemontèis, nojàutri i vorsoma pijesse soen ëd nòstra gent e parleje con la lenga dij sò antich. I l’oma gnun-a preclusion për d’àutre gent (a-i mancherìa!) ma i l’oma la përsuasion che, coma ch’a dis la Paròla ‘d Nosgnor: “...përché chi ch’a l’ha nen soen dij sò, dzurtut ëd coj ch’a son ëd soa famija, a mostra ch’a l’ha arnegà la fej e ch’a l’é pes ëd coj ch’a chërdo nen” (1 Timòt 5:8).

Chi ch'a soma 'd precis? Gnun misteri! Vardé la session dë sto sit indicà coma DOTRIN-A e dëscheuvre lòn ch'i chërdoma. Nòst sit a l'é indipendent, visadì a l'é nen n'emanassion qualsissìa ëd gesie o d'organissassion cristian-e. La cesa 'd Gesù Crist a l'é na realità spiritual: i l'oma nen da manca d'istitussion! Nosgnor Gesù Crist a lo dis ciàir che la cesa a l'ha nen da smijé ai podèj dë sto mond!